ಸಾಹಿತ್ಯಗಳ ಬಗ್ಗೆ ಸಿಂಗಪುರದ ಮಕ್ಕಳಿಗೆ ತಿಳಿಸಿದ ಡಾ.ಸುಧಾಮೂರ್ತಿ

Share and Enjoy !

Shares
Listen to this article

ವಿಜಯನಗರ ವಾಣಿ

ರಜತ ಮಹೋತ್ಸವದ ಸಂಭ್ರಮದಲ್ಲಿರುವ ಕನ್ನಡ ಸಂಘ (ಸಿಂಗಪುರ)ಕ್ಕೆ ಕಳಶಪ್ರಾಯವಾದ ಮತ್ತೊಂದು ಕಾರ್ಯಕ್ರಮ ಪದ್ಮಶ್ರೀ ಡಾ. ಸುಧಾಮೂರ್ತಿ ಅವರು ಸಿಂಗಪುರ ಕನ್ನಡ ಮಕ್ಕಳ ಜೊತೆಗೆ ನಡೆಸಿದ ಮಾತುಕತೆ. ಮುಂಜಾನೆಯ ಸೂರ್ಯರಶ್ಮಿಯನ್ನು ಸ್ವಾಗತಿಸಲು ಕಲರವದೊಂದಿಗೆ ಕಾತರದಿಂದ ಕಾಯುವ ಪುಟ್ಟ ಹಕ್ಕಿಗಳಂತೆ ಕನ್ನಡದ ಮಕ್ಕಳು ತಮ್ಮ ಪೋಷಕರೊಂದಿಗೆ zoom ವೇದಿಕೆಯಲ್ಲಿ ಡಾ. ಸುಧಾಮೂರ್ತಿಯವರ ಆಗಮನಕ್ಕಾಗಿ ಕಾಯುತ್ತಿದ್ದರು.

ದಿನಾಂಕ 18 ಜುಲೈ 2021, ಭಾನುವಾರದಂದು ಆಯೋಜಿಸಿದ್ದ ಕಾರ್ಯಕ್ರಮದಲ್ಲಿ, ಮಕ್ಕಳು, ಪೋಷಕರು ಹಾಗೂ ಸಂಘದ ಇತರ ಸದಸ್ಯರೂ ಸೇರಿ ಸುಮಾರು 125ಕ್ಕೂ ಅಧಿಕ ಮಕ್ಕಳು ಈ ಅವಿಸ್ಮರಣೀಯ ಸಂವಾದದಲ್ಲಿ ಪಾಲ್ಗೊಂಡಿದ್ದರು. ಶ್ರೀಯುತ ರಾಮನಾಥ್ ಅವರು ಡಾ. ಸುಧಾಮೂರ್ತಿಯವರ ಪರಿಚಯ ಮಾಡಿಕೊಟ್ಟರೆ, ಕನ್ನಡ ಸಂಘ (ಸಿಂಗಪುರ)ದ ಅಧ್ಯಕ್ಷರಾದ ಶ್ರೀಯುತ ವೆಂಕಟ್ ಅವರು ಅವರನ್ನು ಕಾರ್ಯಕ್ರಮಕ್ಕೆ ಸ್ವಾಗತಿಸಿದರು.

ಹೆಮ್ಮೆಯ ಕನ್ನಡತಿ, ಲೇಖಕಿ, ಇನ್ಫೋಸಿಸ್ ಪ್ರತಿಷ್ಠಾನದ ಅಧ್ಯಕ್ಷೆ, ಸರಳತೆಗೆ ಮತ್ತೊಂದು ಹೆಸರೆಂದೇ ಜನಜನಿತರಾದ ‘ಪದ್ಮಶ್ರೀ’ ಡಾ. ಸುಧಾಮೂರ್ತಿ ಅವರು ಸಿಂಗನ್ನಡಿಗ ಮಕ್ಕಳೊಂದಿಗೆ ತಮ್ಮ ಅನುಭವದ ಜೀವನ ಪಾಠವನ್ನು, ಜೊತೆಗೆ ತಮ್ಮ ಅದ್ಭುತ ಜ್ಞಾನ ಭಂಡಾರವನ್ನು ಹಂಚಿಕೊಂಡರು. ‘ಮಕ್ಕಳ ಮನಸ್ಸೆಂಬುದು ಹಸಿ ಗೋಡೆಯಂತೆ’. ಹಸಿ ಗೋಡೆಯ ಮೇಲೆ ಮಾಡಿದ ಚಿತ್ತಾರಗಳು ಹೇಗೆ ಗೋಡೆ ಒಣಗಿದರೂ ಉಳಿಯುತ್ತವೆಯೋ ಹಾಗೆಯೇ ಚಿಕ್ಕಂದಿನಲ್ಲಿ ಮಕ್ಕಳು ಕಲಿತ ಜೀವನ ಪಾಠಗಳು ಜೀವನದುದ್ದಕ್ಕೂ ಅವರೊಂದಿಗೆ ಇರುತ್ತವೆ ಎಂದು ಮಾತು ಪ್ರಾರಂಭಿಸಿದ ಅವರು, ಆತ್ಮವಿಶ್ವಾಸವೆಂಬುದು ತೊಡುವ ಬಟ್ಟೆ, ಸೌಂದರ್ಯದಿಂದ ಬರುವುದಿಲ್ಲ, ಸತ್ಯ ನುಡಿಯುವುದರಿಂದ ಆತ್ಮವಿಶ್ವಾಸದಿಂದ ಬರುತ್ತದೆ ಎಂದರು. ತಪ್ಪು ಮಾಡಿದರೂ ಒಪ್ಪಿಕೊಂಡು ನಿಜ ನುಡಿಯುವುದೇ ಆತ್ಮವಿಶ್ವಾಸ, ಛಲಗಾರರಾಗಿ ಹೇಗೆ ಗುರಿ ಸಾಧಿಸಬೇಕು ಎಂದು ಹೇಳುವಾಗ ಅವರು ನೀಡಿದ ತಮ್ಮದೇ ಜೀವನದ ನಿದರ್ಶನಗಳು ನಿಜಕ್ಕೂ ಅನುಕರಣೀಯವಾದುದು.

ಕನ್ನಡ ನಾಡು, ನುಡಿಯ ಗತ ವೈಭವದ ಬಗ್ಗೆ ಅವರು ಮಾತನಾಡುವಾಗ ಮೈ ನವಿರೇಳುವಂತಿತ್ತು. ಕನ್ನಡ ನಾಡಿನ ಅರಸರು ಗುಜರಾತ್, ಬಿಹಾರ, ಮಿಥಿಲಾ ಮುಂತಾದ ರಾಜ್ಯಗಳನ್ನು ಗೆದ್ದು ಆಳ್ವಿಕೆ ನಡೆಸಿದ ಬಗ್ಗೆ, ಅಲ್ಲಿರುವ ಕಲ್ಲಿನ ಶಾಸನಗಳ ಬಗ್ಗೆ ಹಾಗೂ ಅಲ್ಲಿ ಈಗ ಇರುವ ಕೆಲವು ಪ್ರಮುಖ ಮನೆತನಗಳ ಕನ್ನಡ ನಾಡಿನ ನಂಟಿನ ಬಗೆಗಿನ ಮಾಹಿತಿಯನ್ನು ಮಕ್ಕಳೊಂದಿಗೆ ಹಂಚಿಕೊಂಡರು. ಕನ್ನಡ ಭಾಷೆಯ ಇತಿಹಾಸ ಹಾಗೂ ಕನ್ನಡದಲ್ಲಿರುವ ಅನೇಕ ಕಾವ್ಯ, ಸಾಹಿತ್ಯಗಳ ಬಗೆಗೂ ಅವರು ಮಕ್ಕಳಿಗೆ ತಿಳಿಸಿದರು. ಹೊರನಾಡ ಕನ್ನಡಿಗರಿಗೆ ಕನ್ನಡ ಹಾಗೂ ಕನ್ನಡತನವನ್ನು ಉಳಿಸಿ ತಮ್ಮ ಮುಂದಿನ ಪೀಳಿಗೆಗೆ ದಾಟಿಸಲು ಇರುವ ಸಮಸ್ಯೆಗಳ ಬಗೆಗೂ ಅವರು ಮಾತನಾಡಿದರು.

‘ಎಷ್ಟೇ ಚಂದವಾಗಿದ್ದರೂ ಪಕ್ಕದ ಮನೆ ಆಂಟಿ, ಪಕ್ಕದ ಮನೆ ಆಂಟಿಯೇ, ಮಾಮೂಲಿ ಧಿರಿಸಿನಲ್ಲಿದ್ದರೂ ಅಮ್ಮ ಅಮ್ಮನೇ. ಅಮ್ಮನ ಅಪ್ಪುಗೆ ಮಾತ್ರ ಬಿಸಿ. ಚಿಕ್ಕಮ್ಮ, ದೊಡ್ಡಮ್ಮ, ಅತ್ತೆ ಎಲ್ಲರನ್ನೂ ನಾವು ಪ್ರೀತಿಸಬೇಕು. ಆದರೆ ಅಮ್ಮನೊಂದಿಗಿನ ಪ್ರೀತಿ-ಬಾಂಧವ್ಯ ಯಾವತ್ತೂ ಬದಲಾಗದು’ ಎಂಬ ನಿದರ್ಶನದೊಂದಿಗೆ ಅವರು ನಾವು ಹೊರ ನಾಡಿನಲ್ಲಿದ್ದು ಪರಭಾಷೆ ಕಲಿಯುವುದರೊಂದಿಗೆ ನಮ್ಮ ಭಾಷೆ ಕನ್ನಡವನ್ನು ಹೇಗೆ ಉಳಿಸಿ, ಬೆಳೆಸಬಹುದೆಂದು ಸುಂದರವಾಗಿ ವಿವರಿಸಿದರು. ಮುಂದೆ ಮಾತನಾಡುತ್ತಾ ಅವರು ಮಕ್ಕಳನ್ನು ಬೆಳೆಸುವಲ್ಲಿ ಪೋಷಕರ ಪಾತ್ರ ಹಾಗೂ ಕೆಲವು ಅನುಕರಣೀಯ ಸಲಹೆಗಳನ್ನೂ ನೀಡಿದರು.

ಸುಮಾರು ಒಂದೂವರೆ ಗಂಟೆಗಳ ಕಾಲ ಡಾ. ಸುಧಾಮೂರ್ತಿಯವರೊಂದಿಗೆ ನಡೆದ ಸಂವಾದದಲ್ಲಿ ವೇಳೆ ಕಳೆದದ್ದೇ ಗೊತ್ತಾಗಲಿಲ್ಲ. ಕೊನೆಯಲ್ಲಿ ಶ್ರೀಯುತ ರಾಮನಾಥ್ ಅವರು ಹಾಗೂ ಶ್ರೀಯುತ ಶಿವಕುಮಾರ್ ಅವರು ಪ್ರಶ್ನೋತ್ತರ ಕಾರ್ಯಕ್ರಮವನ್ನು ನಡೆಸಿಕೊಟ್ಟರು. ಮಕ್ಕಳು ಹಾಗೂ ಪೋಷಕರು ಅವರು ಬರೆದ ಪುಸ್ತಕಗಳ ಬಗ್ಗೆ, ಅವರ ಸರಳತೆಯ ಬಗ್ಗೆ, ಇನ್ಫೋಸಿಸ್ ಫೌಂಡೇಶನ್ ಬಗ್ಗೆ ಕೇಳಿದ ಅನೇಕ ಪ್ರಶ್ನೆಗಳಿಗೆ ಡಾ.ಸುಧಾಮೂರ್ತಿಯವರು ಸಾವಕಾಶವಾಗಿ ಉತ್ತರಿಸಿದರು.

ತಮ್ಮ ಮುಂಜಾನೆಯ ಸಮಯವನ್ನು ಸಿಂಗಪುರದ ಕನ್ನಡ ಮಕ್ಕಳಿಗಾಗಿ ಮೀಸಲಿಟ್ಟು, ಈ ಒಂದು ಸುವರ್ಣಾವಕಾಶವನ್ನು ಒದಗಿಸಿಕೊಟ್ಟ ಮಾತೃಶ್ರೀ ಸಮಾನರಾದ ‘ಪದ್ಮಶ್ರೀ’ ಡಾ.ಸುಧಾಮೂರ್ತಿ ಅವರನ್ನು ಸಂಘದ ಅಧ್ಯಕ್ಷ ಶ್ರೀಯುತ ವೆಂಕಟ್‌ರವರು ವಂದನಾರ್ಪಣೆಯೊಂದಿಗೆ ಬೀಳ್ಕೊಟ್ಟರು. ಮಕ್ಕಳೊಂದಿಗೆ, ಪೋಷಕರಿಗೂ ಸಹ ಈ ಒಂದು ಅರ್ಥಪೂರ್ಣ, ಪ್ರೇರಣಾತ್ಮಕ ಸಂವಾದ ಕಾರ್ಯಕ್ರಮವು ಚಿರಸ್ಮರಣೀಯವೇ ಸರಿ.

 

Share and Enjoy !

Shares