ಆಗಸ್ಟ್‌ 10 ವಿಶ್ವ ಸಿಂಹಗಳ ದಿನಾಚರಣೆ : ಸಿಂಹಗಳ ರಕ್ಷಣೆಯ ಬಗ್ಗೆ ಜಾಗೃತಿ ಮೂಡಿಸಲು ಈ ದಿನ ಮೀಸಲು

Listen to this article

ವಿಜಯನಗರ ವಾಣಿ

ಗಾಂಭೀರ್ಯದ ನಡಿಗೆ… ತೀಕ್ಷ್ಣ ಕಣ್ಣೋಟ… ತೂಕದ ಹೆಜ್ಜೆಯಲ್ಲೇ ಗತ್ತು ಗೈರತ್ತು… ಸಿಂಹಗಳೆಂದರೇನೇ ಹಾಗೆ… ಕಾಡಿನ ರಾಜರು ಎಂಬ ಹೆಮ್ಮೆಯ ಪ್ರಾಣಿಗಳಿವು. ಸಿಂಹಗಳು ನಮ್ಮ ಆಸ್ತಿ ಕೂಡಾ ಹೌದು. ಇಂತಹ ಸಿಂಹಗಳ ರಕ್ಷಣೆ ಕೂಡಾ ನಮ್ಮ ಜವಾಬ್ದಾರಿ. ಇದೇ ಕಾರಣಕ್ಕೆ ಸಿಂಹಗಳ ಉಳಿವಿಗಾಗಿ ಒಂದು ದಿನ ಮೀಸಲಿಡಲಾಗಿದೆ. ಆಗಸ್ಟ್‌ 10ರಂದು ಪ್ರತಿವರ್ಷ ವಿಶ್ವ ಸಿಂಹಗಳ ದಿನವನ್ನು ಆಚರಿಸಿಕೊಂಡು ಬರಲಾಗುತ್ತಿದೆ.

ಸಿಂಹಗಳ ರಕ್ಷಣೆ, ಕಾಡಿನ ಉಳಿವಿಗಾಗಿ ಜಾಗೃತಿ ಮೂಡಿಸುವ ಸಲುವಾಗಿ ಈ ದಿನದ ಆಚರಣೆ ಮಾಡಲಾಗುತ್ತದೆ. 2013ರಿಂದ ಪ್ರತಿವರ್ಷ ಆಗಸ್ಟ್‌ 10ರಂದು ವಿಶ್ವ ಸಿಂಹಗಳ ದಿನವನ್ನು ಆಚರಿಸಿಕೊಂಡು ಬರಲಾಗುತ್ತಿದೆ. ಒಂದು ಕಾಲದಲ್ಲಿ ಸಾಕಷ್ಟು ಸಂಖ್ಯೆಯಲ್ಲಿದ್ದ ಸಿಂಹಗಳು ಕ್ರಮೇಣ ವಿನಾಶದಂಚಿಗೆ ತಲುಪಿದ್ದವು. ಹೀಗಾಗಿ, ಸಿಂಹಗಳ ಸಂತತಿಯ ರಕ್ಷಣೆ ಅತೀ ದೊಡ್ಡ ಜವಾಬ್ದಾರಿ ಕೂಡಾ ಆಗಿತ್ತು.

ಇತ್ತೀಚಿನ ದಿನಗಳಲ್ಲಿ ಸಿಂಹ ಸೇರಿದಂತೆ ವಿವಿಧ ಪ್ರಾಣಿಗಳ ರಕ್ಷಣೆಗೆ ಕೈಗೊಳ್ಳುವ ಕ್ರಮಗಳಿಂದ ಇವುಗಳ ಸಂಖ್ಯೆ ಕೊಂಚ ಏರಿಕೆಯಾಗಿದೆ ಎಂಬುದು ಸಮಾಧಾನದ ಸಂಗತಿ. 2020ರಲ್ಲಿ ಗುಜರಾತಿನ ಗಿರ್ ಅರಣ್ಯದಲ್ಲಿ ಏಷಿಯಾಟಿಕ್ ಸಿಂಹಗಳ ಸಂಖ್ಯೆಯು ಸುಮಾರು 29% ಹೆಚ್ಚಾಗಿದೆ. ಭೌಗೋಳಿಕವಾಗಿ ಸಿಂಹಗಳಿರುವ ಪ್ರದೇಶವು 36% ಹೆಚ್ಚಾಗಿದೆ ಎನ್ನುತ್ತದೆ ಅಂಕಿಅಂಶಗಳು.

ಇಂಟರ್ನ್ಯಾಷನಲ್ ಯೂನಿಯನ್ ಫಾರ್ ಕನ್ಸರ್ವೇಶನ್ ಆಫ್ ನೇಚರ್ (ಐಯುಸಿಎನ್) ಸಂಸ್ಥೆ ಪ್ರಸ್ತುತ ಏಷಿಯಾಟಿಕ್ ಸಿಂಹಗಳನ್ನು ಅಳಿವಿನಂಚಿನಲ್ಲಿರುವ ಪ್ರಾಣಿಗಳ ಪಟ್ಟಿಯಲ್ಲಿ ಸೇರಿಸಿದೆ. ಹೀಗಾಗಿ, ಸಿಂಹಗಳ ರಕ್ಷಣೆಯ ಜವಾಬ್ದಾರಿ ನಮ್ಮ ಮೇಲೆಯೂ ಇದೆ. ಕಾಡಿನ ಅತಿಕ್ರಮಣ, ಸಿಂಹಗಳ ಸಹಜ ಅವಾಸಸ್ಥಾನಗಳ ನಾಶದಿಂದ ಇವುಗಳು ಕಷ್ಟಕ್ಕೆ ಸಿಲುಕಿಕೊಳ್ಳುತ್ತಿವೆ. ಬೇಟೆ ಕೂಡಾ ಸಿಂಹಗಳು ಸೇರಿದಂತೆ ಎಲ್ಲಾ ಪ್ರಾಣಿಗಳ ಸಂತತಿ ನಾಶವಾಗುವುದಕ್ಕೆ ಒಂದು ಕಾರಣವಾಗಿದೆ ಎಂಬುದು ಸತ್ಯ. ಆದರೆ, ಬೇಟೆಗಿಂತಲೂ ಇವುಗಳ ಸಹಜ ಆವಾಸ ಸ್ಥಾನದ ಮೇಲೆ ನಡೆಯುವ ನಮ್ಮ ಪ್ರಹಾರ ಕೂಡಾ ಅವುಗಳ ಬದುಕನ್ನೇ ಕಸಿದು ಬಿಡುತ್ತದೆ ಎಂಬುದು ಕೂಡಾ ಒಪ್ಪಲೇಬೇಕಾದ ಸಂಗತಿ.

ಇದೇ ಕಾರಣಕ್ಕೆ ಸಿಂಹಗಳ ದಿನವನ್ನು ಆಚರಿಸಿಕೊಂಡು ಬರಲಾಗುತ್ತದೆ. ಈ ದಿನವನ್ನು ಸಿಂಹಗಳ ರಕ್ಷಣೆಯ ಬಗ್ಗೆ ಜಾಗೃತಿ ಮೂಡಿಸುವ ಜತೆಗೆ ಇದು ಸಿಂಹಗಳ ರಕ್ಷಣಾ ಕಾರ್ಯದಲ್ಲಿ ತೊಡಗಿರುವ ಎಲ್ಲಾ ಪರಿಸರ ಪ್ರೇಮಿಗಳಿಗೂ ಧನ್ಯವಾದ ಅರ್ಪಿಸುವ ದಿನ ಕೂಡಾ ಹೌದು.