ಕೋವ್ಯಾಕ್ಸಿನ್, ಕೋವಿಶೀಲ್ಡ್ ಲಸಿಕೆಗಳ ಮಿಶ್ರಣ ಅಧ್ಯಯನಕ್ಕೆ ಭಾರತೀಯ ಔಷಧ ನಿಯಂತ್ರಣ ನಿರ್ದೇಶನಾಲಯ ಅನುಮತಿ

Listen to this article

ವಿಜಯನಗರ ವಾಣಿ

ಭಾರತದಲ್ಲಿ ಮುಖ್ಯವಾಗಿ ಬಳಕೆಯಾಗುತ್ತಿರುವ ಎರಡು ಕೋವಿಡ್ 19 ಲಸಿಕೆಗಳಾದ ಕೋವಿಶೀಲ್ಡ್ ಮತ್ತು ಕೋವ್ಯಾಕ್ಸಿನ್ ಲಸಿಕೆಗಳನ್ನು ಮಿಶ್ರಣ ಮಾಡುವ ಅಧ್ಯಯನ ನಡೆಸಲು ಭಾರತೀಯ ಔಷಧ ನಿಯಂತ್ರಣ ನಿರ್ದೇಶನಾಲಯ (ಡಿಸಿಜಿಐ) ಅನುಮತಿ ನೀಡಿದೆ. ಕೊರೊನಾ ವೈರಸ್ ವಿರುದ್ಧ ಭಾರತದ ಹೋರಾಟದಲ್ಲಿ ಇದು ಮಹತ್ವದ ಹೆಜ್ಜೆಯಾಗಿದೆ.

ತಮಿಳುನಾಡಿನಲ್ಲಿರುವ ವೆಲ್ಲೋರ್ ಕ್ರಿಶ್ಚಿಯನ್ ವೈದ್ಯಕೀಯ ಕಾಲೇಜು ಈ ಅಧ್ಯಯನ ಮತ್ತು ಕ್ಲಿನಿಕಲ್ ಪ್ರಯೋಗಗಳನ್ನು ನಡೆಸಲಿದೆ. ಕೇಂದ್ರ ಔಷಧ ಗುಣಮಟ್ಟ ನಿಯಂತ್ರಣ ಸಂಸ್ಥೆಯ (ಸಿಡಿಎಸ್‌ಸಿಒ) ವಿಷಯ ಪರಿಣತರ ಸಮಿತಿಯು ಈ ಲಸಿಕೆ ಮಿಶ್ರಣ ಅಧ್ಯಯನ ನಡೆಸಲು ಜುಲೈ 29ರಂದು ಶಿಫಾರಸು ಮಾಡಿತ್ತು.

ಎರಡು ಕೋವಿಡ್ ಲಸಿಕೆಗಳನ್ನು ಮಿಶ್ರಣ ಮಾಡುವುದು ಹೆಚ್ಚಿನ ಸುರಕ್ಷತೆ ಹಾಗೂ ಪ್ರತಿರಕ್ಷಣಾ ಫಲಿತಾಂಶವನ್ನು ನೀಡಬಲ್ಲದು ಎಂದು ಭಾರತೀಯ ವೈದ್ಯಕೀಯ ಸಂಶೋಧನಾ ಮಂಡಳಿ (ಐಸಿಎಂಆರ್) ಹೇಳಿತ್ತು. ಆದರೆ ಈ ಸಂಶೋಧನೆಯು ಐಸಿಎಂಆರ್ ಶಿಫಾರಸಿಗಿಂತ ವಿಭಿನ್ನವಾಗಿರಲಿದೆ.

ಲಸಿಕೆಗಳ ಮಿಶ್ರಣವು ಅವುಗಳ ಸುರಕ್ಷತೆ ಹಾಗೂ ಪರಿಣಾಮಗಳ ಬಗ್ಗೆ ಆತಂಕವನ್ನೂ ಮೂಡಿಸಿದೆ. ಉತ್ತರ ಪ್ರದೇಶದಲ್ಲಿ ಮೊದಲ ಡೋಸ್ ಕೋವಿಶೀಲ್ಡ್ ಪಡೆದವರಿಗೆ ಆರು ವಾರಗಳ ಅಂತರದ ಬಳಿಕ ಎರಡನೆಯ ಡೋಸ್ ಆಗಿ ಕೋವ್ಯಾಕ್ಸಿನ್ ನೀಡುವ ಅಧ್ಯಯನವನ್ನು ನಡೆಸಲಾಗಿದೆ.

ವಿಭಿನ್ನ ಗುಂಪುಗಳ 18 ಮಂದಿಯನ್ನು ಇದರಲ್ಲಿ ಬಳಸಲಾಗಿತ್ತು. ಆದರೆ ಇಬ್ಬರು ವ್ಯಕ್ತಿಗಳು ಪ್ರಯೋಗಕ್ಕೆ ಒಪ್ಪಿಕೊಳ್ಳದೆ ಇದ್ದಿದ್ದರಿಂದ ಅವರನ್ನು ಹೊರಗಿಡಲಾಗಿತ್ತು. ಇವರಲ್ಲಿ 62 ವರ್ಷದವರೆಗಿನ 11 ಪುರುಷರು ಮತ್ತು 7 ಮಂದಿ ಮಹಿಳೆಯರು ಇದ್ದರು. ಅಡೆನೋ ವೈರಸ್ ವೆಕ್ಟರ್ ಪ್ಲಾಟ್‌ಫಾರ್ಮ್ ಆಧಾರಿತ ಲಸಿಕೆ ಪಡೆದ ನಂತರ ನಿಷ್ಕ್ರಿಯಗೊಳಿಸಿದ ವೈರಸ್ ಲಸಿಕೆಯನ್ನು ನೀಡುವ ಸಂಯೋಜನೆಯು ಸುರಕ್ಷಿತ ಮಾತ್ರವಲ್ಲ, ಒಟ್ಟಾರೆ ಪ್ರತಿರಕ್ಷಣಾ ಸಾಮರ್ಥ್ಯವನ್ನು ಉತ್ತಮಗೊಳಿಸಲಿದೆ ಎಂದು ಐಸಿಎಂಆರ್ ಹೇಳಿದೆ.