ಧಾರವಾಡ ಆ.30: ಧಾರವಾಡದ ಟಿ.ವಿ.ಟವರ್‍ದ ನಿವಾಸಿ ಇಸ್ಮೈಲ್ ಮಾನಿಕ ಎನ್ನುವವರು ದಿ:25/10/2022 ರಂದು ರೂ.80,000 ಪಾವತಿಸಿ ಇಲೆಕ್ಟ್ರೀಕ್ ಸ್ಕೂಟರನ್ನು ಎದುರುದಾರರಿಂದ ಖರೀದಿಸಿದ್ದರು. ವಾಹನವು ಬ್ಯಾಟರಿಯ ಮೇಲೆ 5 ವರ್ಷದ ವಾರಂಟಿಯನ್ನು ಹೊಂದಿತ್ತು. ದೂರುದಾರರು ಎದುರುದಾರರ ಹೇಳಿಕೆಯಂತೆ ವಾಹನವನ್ನು ಉಪಯೋಗಿಸುತ್ತಿದ್ದು ನಂತರ ಬ್ಯಾಟರಿಯ ಕಾರ್ಯ ಸ್ಥಗಿತಗೊಂಡು ವಾಹನವು ರಸ್ತೆಯ ಮಧ್ಯ ನಿಲ್ಲಲು ಪ್ರಾರಂಭಿಸಿತು. ಅಲ್ಲದೇ ಎದುರುದಾರರು ಹೇಳಿದಷ್ಟು ಮೈಲೇಜನ್ನೂ ಸಹ ವಾಹನವು ಕೊಡುತ್ತಿರಲಿಲ್ಲ. ಈ ವಿಷಯವನ್ನು ದೂರುದಾರರು ಎದುರುದಾರರಿಗೆ ತಿಳಿಸಿದಾಗ ವಾಹನವು ವಾರಂಟಿಯಲ್ಲಿದ್ದರೂ ಕೂಡ ದೂರುದಾರರಿಂದ ಒಂದು ಸಾವಿರ ರೂಪಾಯಿ ಹೆಚ್ಚಿನ ಹಣ ಪಡೆದು ವಾಹನದ ಬ್ಯಾಟರಿಯನ್ನು ಎದುರುದಾರರು ರಿಪೇರಿ ಮಾಡಿಕೊಟ್ಟಿರುತ್ತಾರೆ. ದೂರುದಾರರು ವಾಹನವನ್ನು ಉಪಯೋಗಿಸಲು ಪ್ರಾರಂಭಿಸಿದ ನಂತರ 70 ಕಿ.ಮೀ ಮೈಲೆಜ ಕೊಡುವ ಬದಲು ಕೇವಲ 20 ಕಿ.ಮೀ ಕೊಡಲು ಪ್ರಾರಂಭಿಸಿತು. ಈ ವಿಷಯವನ್ನು ಎದುರುದಾರರಿಗೆ ತಿಳಿಸಲು ಅವರು ಒಂದಿಲ್ಲೋಂದು ನೆಪ ಹೆಳುತ್ತಾ ದೂರುದಾರರ ವಾಹನದ ಬ್ಯಾಟರಿಯನ್ನು ಸರಿಪಡಿಸಿರುವುದಿಲ್ಲ. ಮನನೊಂದ ದೂರುದಾರರು ಇದರಿಂದ ತಮ್ಮ ದಿನ ನಿತ್ಯದ ವ್ಯವಹಾರಗಳಿಗೆ ಸಾಕಷ್ಟು ತೊಂದರೆ ಅನುಭವಿಸುತ್ತಿದ್ದು, ಎದುರುದಾರರ ಇಂತಹ ನಡವಳಿಕೆ ಗ್ರಾಹಕರ ರಕ್ಷಣಾ ಕಾಯ್ದೆ ಅಡಿ ಸೇವಾ ನ್ಯೂನ್ಯತೆ ಆಗುತ್ತದೆ ಅಂತಾ ಹೇಳಿ ಅವರ ವಿರುದ್ಧ ಕ್ರಮಕೈಗೊಳ್ಳುವಂತೆ ದೂರುದಾರರು ಧಾರವಾಡ ಜಿಲ್ಲಾ ಗ್ರಾಹಕರ ಆಯೋಗಕ್ಕೆ ದಿ: 20/08/2024 ರಂದು ದೂರನ್ನು ಸಲ್ಲಿಸಿದ್ದರು.
ಸದರಿ ದೂರಿನ ಬಗ್ಗೆ ಕೂಲಂಕುಷವಾಗಿ ವಿಚಾರಣೆ ನಡೆಸಿದ ಆಯೋಗದ ಅಧ್ಯಕ್ಷರಾದ ಈಶಪ್ಪ. ಭೂತೆ ಹಾಗೂ ವಿಶಾಲಾಕ್ಷಿ. ಅ. ಬೋಳಶೆಟ್ಟಿ ಸದಸ್ಯರು, ದೂರುದಾರರು ಎದುರುದಾರರಾದ ಟ್ರೈಯೋ ಗ್ರೂಪ್ಸ್ ಇವರಲ್ಲಿ ರೂ.80,000 ಹಣ ಪಾವತಿಸಿ ಪ್ಯೂವರ್ ಎನರ್ಜಿಯ ಇ-ವಾಹನವನ್ನು ಖರೀದಿಸಿದ್ದರು. ಆದರೆ ವಾಹನ ಖರೀದಿಸಿದ ಕೆಲವೇ ತಿಂಗಳುಗಳಲ್ಲಿ ಬ್ಯಾಟರಿ ಸರಿಯಾಗಿ ಕೆಲಸ ಮಾಡದೆ ಇದ್ದ ಕಾರಣ ಅದನ್ನು ಎದುರುದಾರರಿಗೆ ತಿಳಿಸಲು ಅವರು ರಿಪೇರಿ ಮಾಡಿಕೊಟ್ಟರು ಸಹ ಅದು ಕಡಿಮೆ ಮೈಲೇಜ್ ಕೊಡುತ್ತಿರುವುದನ್ನು ಗಮನಿಸಿದ ದೂರುದಾರರು ಅದನ್ನು ರಿಪೇರಿ ಮಾಡಿಕೊಡುವಂತೆ ಅಥವಾ ಹೊಸ ಬ್ಯಾಟರನ್ನು ಅಳವಡಿಸುವಂತೆ ಸಾಕಷ್ಟು ಸಲ ಎದುರುದಾರರಿಗೆ ಕೇಳಿಕೊಂಡರು ಇವತ್ತಿನವರೆಗು ಅದನ್ನು ಸರಿಪಡಿಸಿರುವುದಿಲ್ಲ. ಅಲ್ಲದೇ ವಾಹನದ ಉತ್ಪಾದಕರಾದ ಒಂದನೇ ಎದುರುದಾರರು ತಮ್ಮ ಸರ್ವಿಸ್ ಸ್ಟೇಶನನ್ನು ಕಾಯಂ ಮುಚ್ಚಿರುವದರಿಂದ ಗ್ರಾಹಕರಿಗೆ ವಾಹನದ ಸಮಸ್ಯೆ ಬಂದಾಗ ಅದನ್ನು ರಿಪೇರಿ ಮಾಡಿಸಿಕೊಳ್ಳುಲು ಆಗುವುದಿಲ್ಲ. ಉತ್ಪಾದಕರಾದ ಒಂದನೇ ಎದುರುದಾರರು ಗ್ರಾಹಕರ ದೂರುಗಳಿಗೆ ಸೇವೆಯನ್ನು ಒದಗಿಸುವುದು ಅತ್ಯಂತ ಅವಶ್ಯಕವಿರುತ್ತದೆ. ಆದರೆ ಎದುರುದಾರರು ಅದನ್ನು ಅನುವು ಮಾಡಿಕೊಡದೆ ಸೇವಾ ನ್ಯೂನ್ಯತೆ ಎಸಗಿರುವುದು ಆಯೋಗಕ್ಕೆ ಕಂಡು ಬರುತ್ತದೆ. ಇಂತಹ ಎದುರುದಾರ ನಡಾವಳಿಕೆ ಗ್ರಾಹಕರ ರಕ್ಷಣಾ ಕಾಯ್ದೆಯಡಿಯಲ್ಲಿ ಸೇವಾ ನ್ಯೂನ್ಯತೆ ಎಸಗುವುದರೊಂದಿಗೆ ಅನುಚಿತ ವ್ಯಾಪಾರ ಪದ್ಧತಿ ಮಾಡಿದ್ದಾರೆಂದು ಆಯೋಗ ಅಭಿಪ್ರಾಯಪಟ್ಟು ತೀರ್ಪು ನೀಡಿದೆ.
ಈ ಎಲ್ಲ ಸಂಗತಿಗಳನ್ನು ಆಧರಿಸಿ ಎದುರುದಾರ ಪ್ಯೂವರ್ ಎನರ್ಜಿ ಟ್ರೈಯೋ ಗ್ರೂಪ್ಸ್ ಕಂಪನಿಗೆ ಆದೇಶವಾದ ಒಂದು ತಿಂಗಳ ಒಳಗಾಗಿ ದೂರುದಾರರ ವಾಹನಕ್ಕೆ ಹೊಸ ಬ್ಯಾಟರಿಯನ್ನು ಅಳವಡಿಸಿ ಕೊಡಬೇಕು, ಒಂದು ವೇಳೆ ಅದನ್ನು ಸರಿಪಡಿಸಿಕೊಡದೇ ಇದ್ದ ಕಾರಣ ದೂರುದಾರರ ಪಾವತಿ ಮಾಡಿದ ಹಣ ರೂ.80,000 ಮರಳಿ ಕೊಡಬೇಕು ಮತ್ತು ದೂರುದಾರರಿಗೆ ಆಗಿರುವ ಅನಾನುಕೂಲ, ತೊಂದರೆ ಹಾಗೂ ಮಾನಸಿಕ ಹಿಂಸೆಗಾಗಿ ರೂ.50,000 ಪರಿಹಾರ ಮತ್ತು ರೂ.10,000 ಪ್ರಕರಣದ ಖರ್ಚು ವೆಚ್ಚ ನೀಡುವಂತೆ ಆಯೋಗ ಪ್ಯೂವರ್ ಎನರ್ಜಿ ಪ್ರೈ.ಲಿ. ಗೆ ತನ್ನ ಆದೇಶದಲ್ಲಿ ನಿರ್ದೇಶಿಸಿದೆ
