ಇನ್ನೇನು ಜಾತ್ರೆಗೆ ತಿಂಗಳು ಇದೆ ಎನ್ನುವಾಗಲೇ ಸುತ್ತಲ ಹಳ್ಳಿಗಳಲ್ಲಿ ದಾಸೋಹಕ್ಕೆ ವಿವಿಧ ಬಗೆಯ ಹೋಳಿಗೆಗಳು, ಕರ್ಚಿಕಾಯಿ, ಮಾದಲಿ, ಸಜ್ಜೆ ಮತ್ತು ಜೋಳದ ಹಿಟ್ಟಿನಿಂದ ತಯಾರಿಸಿದ ರೊಟ್ಟಿಗಳನ್ನು, ಹಲವಾರು ವಿಧದ ಚಟ್ನಿಪುಡಿಗಳನ್ನು, ಕೆಂಪು ಚಟ್ನಿ, ಉಪ್ಪಿನಕಾಯಿಗಳನ್ನು ತಯಾರಿಸುವ ಭಕ್ತರು ಡೊಳ್ಳಿನ ಮೆರವಣಿಗೆಯೊಂದಿಗೆ ತಲೆಯ ಮೇಲೆ ಪುಟ್ಟಿಯನ್ನು ಹೊತ್ತು ಇಲ್ಲವೇ ಅಲಂಕರಿಸಿದ ಎತ್ತಿನ ಬಂಡಿಗಳಲ್ಲಿ, ಟ್ರ್ಯಾಕ್ಟರ್ಗಳಲ್ಲಿ ಶ್ರೀಮಠಕ್ಕೆ ತಂದು ಅರ್ಪಿಸುತ್ತಾರೆ. ಮತ್ತೆ ಕೆಲವರು ಬೆಲ್ಲ, ಸಕ್ಕರೆಯಂತಹ ನೂರಾರು ದಿನಸಿ ಪದಾರ್ಥಗಳನ್ನು, ಅಕ್ಕಿಯ ಮೂಟೆಗಳನ್ನು ಇನ್ನು ಕೆಲವರು ತರಕಾರಿಗಳನ್ನು ಹಣ್ಣು ಹಂಪಲುಗಳನ್ನು ತಂದು ಶ್ರೀ ಮಠಕ್ಕೆ ಅರ್ಪಿಸುತ್ತಾರೆ. ಸುತ್ತಲ ಜಿಲ್ಲೆಗಳ ನೂರಾರು ಊರುಗಳ ಸಾವಿರಾರು ಮನೆಗಳಿಂದ ಹೀಗೆ ಶೇಖರವಾಗುವ ಆಹಾರದ ದಾಸ್ತಾನು ನೋಡಲು ಕಣ್ಣಿಗೆ ಹಬ್ಬವನ್ನುಂಟು ಮಾಡುತ್ತದೆ. ಇದುವೇ ದಕ್ಷಿಣ ಭಾರತದ ಮಹಾ ಕುಂಭಮೇಳ ಎಂದೆನಿಸಿದ ಕೊಪ್ಪಳ ನಗರದ ಗವಿಸಿದ್ದೇಶ್ವರ ಮಠದ ಅನ್ನದಾಸೋಹದ ಪರಿ.
ಇನ್ನು ಮುಂಜಾನೆ ಮೂರು ಗಂಟೆಗೆ ಒಲೆಗೆ ಉರಿ ಹಚ್ಚಿದರೆ ಅದು ನಂದುವುದು ಮಧ್ಯರಾತ್ರಿ ಒಂದು ಗಂಟೆಗೆ. ದಿನವೂ ಲಕ್ಷಾಂತರ ಜನ ಭಕ್ತರಿಗೆ ಅಡುಗೆ ತಯಾರಿಸಲು, ತರಕಾರಿಗಳನ್ನು ತೊಳೆದು ಹೆಚ್ಚಲು, ಭಕ್ತರಿಗೆ ಉಣಬಡಿಸಲು, ಶಿಸ್ತಿನಿಂದ ಸಾಲುಗಳಲ್ಲಿ ಸಾಗಿ ಅನ್ನ ಪ್ರಸಾದವನ್ನು ಸ್ವೀಕರಿಸಲು ಜನರಿಗೆ ದಾರಿ ತೋರಲು ಹೀಗೆ ಹತ್ತು ಹಲವು ಗುಂಪುಗಳಲ್ಲಿ ಸ್ವಯಂಸೇವಕರಾಗಿ ಕಾರ್ಯನಿರ್ವಹಿಸುತ್ತಿರುವ ವಿದ್ಯಾರ್ಥಿಗಳು, ಯುವಕರು, ಕಾಲೇಜುಗಳ ಎನ್ ಎಸ್ ಎಸ್ ಮತ್ತು ಎನ್ ಸಿ ಸಿ ಘಟಕದ ವಿದ್ಯಾರ್ಥಿಗಳು,ಮಹಿಳೆಯರು ವೃದ್ಧರು ಮತ್ತು ಪೊಲೀಸ್ ಇಲಾಖೆಯ ಸಿಬ್ಬಂದಿಗಳು, ಗೃಹರಕ್ಷಕ ದಳದವರು ಈ ಅನ್ನ ದಾಸೋಹದ ಕೈಂಕರ್ಯದಲ್ಲಿ ಕಿಂಚಿತ್ತು ಅಡೆ ತಡೆಯಾಗದಂತೆ ತಮ್ಮ ಸೇವೆಯನ್ನು ಸಲ್ಲಿಸುತ್ತಾರೆ.
ಜಾತ್ರೆ ಎಂದರೆ ಕೇವಲ ಧಾರ್ಮಿಕ ಆಚರಣೆಯಲ್ಲ, ರಥೋತ್ಸವವಲ್ಲ… ಬದಲಾಗಿ ಜನರಲ್ಲಿ ವಿವಿಧ ಸಾಮಾಜಿಕ ವಿಷಯಗಳ ಕುರಿತು ಜಾಗೃತಿಯನ್ನು ಮೂಡಿಸುವ, ಸಮಾಜಮುಖಿಯಾಗಿ ಜನರನ್ನು ಪ್ರೇರೇಪಿಸುವ ಕಾರ್ಯಕ್ರಮ. ಈ ಕಾರ್ಯಕ್ರಮದ ಅಂಗವಾಗಿ ಶ್ರೀ ಗವಿಮಠ ಸಂಸ್ಥಾನವು ಈ ಬಾರಿ ವಿವಿಧ ಗ್ರಾಮೀಣ ಕ್ರೀಡೆಗಳನ್ನು ಆಯೋಜಿಸುವ ಮೂಲಕ ಜನರಲ್ಲಿ ಗ್ರಾಮೀಣ ಕ್ರೀಡೆಗಳ ಕುರಿತಾದ ಆಸಕ್ತಿಯನ್ನು ಮೂಡಿಸಿದೆ. ಬಹುದೊಡ್ಡ ಮೊತ್ತದ ಬಹುಮಾನಗಳನ್ನು ಈ ಕ್ರೀಡೆಗಳಲ್ಲಿ ಗೆದ್ದವರಿಗೆ ನೀಡುವ ಮೂಲಕ ಮುಂದಿನ ದಿನಮಾನಗಳಲ್ಲಿ ಗ್ರಾಮೀಣ ಕ್ರೀಡೆಯ ಭವಿಷ್ಯವನ್ನು ಉಜ್ವಲಗೊಳಿಸಲು ಭದ್ರಬುನಾದಿಯನ್ನು ಶ್ರೀ ಮಠವು ಹಾಕಿದೆ.
ಆರೋಗ್ಯದ ಜಾಗೃತಿಯನ್ನು ಮೂಡಿಸುವ ಉಚಿತ ಹೆಲ್ತ್ ಕ್ಯಾಂಪ್ ಗಳ ಮೂಲಕ ಜನ ಸಮುದಾಯಕ್ಕೆ ಆರೋಗ್ಯದ ಮಹತ್ವವನ್ನು ಅರಿಯಲು ಅವಕಾಶ ಮಾಡಿಕೊಟ್ಟಿದೆ. ಸತತ ಮೂರು ದಿನಗಳ ಕಾರ್ಯಕ್ರಮದಲ್ಲಿ ವಿವಿಧ ಮಠಗಳ ಮಠಾಧೀಶರಿಂದ ನಮ್ಮ ಧಾರ್ಮಿಕ ಪರಂಪರೆಯ ಕುರಿತಾದ ಜ್ಞಾನವನ್ನು ಹಂಚುವ ಮಹಾ ‘ಜ್ಞಾನ ದಾಸೋಹ’ ಕೊಪ್ಪಳದ ಗವಿಮಠದಲ್ಲಿ ಏರ್ಪಾಡಾಗಿದೆ.
ಕಳೆದ ವರ್ಷದಿಂದ ಸುಮಾರು 5000ಕ್ಕೂ ಹೆಚ್ಚು ಜನ ಮಕ್ಕಳಿಗೆ ಆಶ್ರಯವನ್ನು ನೀಡಿ ಅಕ್ಷರ ದಾಸೋಹವನ್ನು ಆರಂಭಿಸಿರುವ ಶ್ರೀಮಠಕ್ಕೆ ಸಾವಿರಾರು ಭಕ್ತರು ತಮ್ಮ ಕೈಲಾದಷ್ಟು ದೇಣಿಗೆಯನ್ನು ನೀಡಿ ಜ್ಞಾನ ದಾಸೋಹದ ಅರಿವಿನ ಜ್ಯೋತಿ ನಿರಂತರವಾಗಿ ಪ್ರಜ್ವಲಿಸುವಂತೆ ಮಾಡಿದ್ದಾರೆ. ‘ಹನಿ ಹನಿಗೂಡಿದರೆ ಹಳ್ಳ, ತೆನೆ ತೆನೆ ತೆನೆಗೂಡಿದರೆ ಬಳ್ಳ’ ಎಂಬ ಮಾತಿನಂತೆ ಕೊಪ್ಪಳ ಮಹಾನಗರದಲ್ಲಿ ಅನ್ನ,ಆಶ್ರಯ ಮತ್ತು ಜ್ಞಾನದ ತ್ರಿವಿಧ ದಾಸೋಹ ಮೂರ್ತಿಯಾಗಿ ಕಂಗೊಳಿಸುತ್ತಿರುವ ವರು ಶ್ರೀಮಠದ ಪರಂಪರೆಯನ್ನು ಮುಂದುವರಿಸಿಕೊಂಡು ಹೋಗುತ್ತಿರುವ 18ನೇ ಪೀಠಾಧಿಪತಿಗಳೇ ಅಭಿನವ
ಗವಿಸಿದ್ದೇಶ್ವರ ಮಹಾಸ್ವಾಮಿಗಳು.
ವಿನಯವೇ ಮೈವೆತ್ತಂತ ಸ್ವಾಮೀಜಿಯವರ ತಾಯಿ ಮಡಿಲಿನ ಪ್ರೀತಿಯ ಮಮತೆಯಲ್ಲಿ ಉಂಡು ಓದಿ ಬೆಳೆಯುತ್ತಿರುವ ಮಕ್ಕಳು ಭವ್ಯ ಭವಿಷ್ಯದ ನಾಗರಿಕರಾಗುವುದರಲ್ಲಿ ಸಂದೇಹವೇ ಇಲ್ಲ.
ಈ ಬಾರಿಯ ಜಾತ್ರೆಯ ವಿಶೇಷವೆಂದರೆ 11ನೇ ಜನವರಿ 2025ರಂದು ವಿಕಲಚೇತನರ ಸಬಲೀಕರಣಕ್ಕಾಗಿ ಸಕಲಚೇತನ ಎಂಬ ನಡಿಗೆಯ ಕಾರ್ಯಕ್ರಮವನ್ನು ಈಗಾಗಲೇ ನಡೆಸಿದ್ದು, ಕಳೆದ ಹಲವಾರು ದಿನಗಳಿಂದ ಗ್ರಾಮೀಣ ಕ್ರೀಡೆಗಳನ್ನು ಆಯೋಜಿಸಲಾಗಿದೆ. ಅದರಲ್ಲೂ ಮುಖ್ಯವಾಗಿ ಕುಸ್ತಿ, ಗುಂಡು ಎತ್ತುವ ಸ್ಪರ್ಧೆ, ಎತ್ತಿನ ಬಂಡಿಗಳನ್ನು ಅಲಂಕರಿಸುವ ಸ್ಪರ್ಧೆಗಳನ್ನು ಏರ್ಪಡಿಸಲಾಗಿದ್ದು ಇದು ಗ್ರಾಮೀಣ ಬದುಕಿನ ಕುರಿತು ಒಳ್ಳೆಯ ಆಸಕ್ತಿಯನ್ನು ಹುಟ್ಟಿಸುವಲ್ಲಿ ಸಹಾಯಕವಾಗಿದೆ.
ಹಿನ್ನೆಲೆ….ಕೊಪ್ಪಳ ಗವಿಮಠದ ಜಾತ್ರೆಯನ್ನು ಕೊಪ್ಪಳದ ಗವಿಮಠದ 11ನೇ ಪೀಠಾಧಿಪತಿ ಶ್ರೀ ಗವಿಸಿದ್ದೇಶ್ವರ ಮಹಾಸ್ವಾಮಿಯವರ ಲಿಂಗೈಕ್ಯ ದಿನದಂದು ಆಚರಿಸಲಾಗುತ್ತದೆ. 800 ವರ್ಷಗಳ ಇತಿಹಾಸವಿರುವ ಕೊಪ್ಪಳ ಗವಿಮಠದ ಮೊದಲ ಪೀಠಾಧಿಪತಿಯಾದ ರುದ್ರಮುನಿ ಸ್ವಾಮಿಗಳು ಕರ್ನಾಟಕ ರಾಜ್ಯದಲ್ಲಿ ವೀರಶೈವ ಧರ್ಮವನ್ನು ಹೆಚ್ಚು ಪ್ರಚಲಿತಗೊಳಿಸಿದವರು. ಅವರು ಕಾಶಿಯ ಜಂಗಮವಾಡಿ ಮಠದಿಂದ 1080ರಲ್ಲಿ ಧರ್ಮ ಪ್ರಸಾರ ಮಾಡುತ್ತಾ ಕೊಪ್ಪಳ ನಗರದ ಪೂರ್ವ ದಿಕ್ಕಿನಲ್ಲಿರುವ ಗುಡ್ಡದ ಗವಿಯಲ್ಲಿ ನೆಲೆಸಿದರು. ಹಾಗೆ ಇವರು ನೆಲೆಸಿದ ಮಠವೇ ಗವಿಮಠ. ಇವರ ನಂತರ ಇವರ ಉತ್ತರಾಧಿಕಾರಿಗಳ ಪರಂಪರೆ ಆರಂಭವಾಯಿತು. ಮುಂದೆ 11 ನೇ ಪೀಠಾಧಿಪತಿಯಾಗಿ ಬಂದ ಗವಿಸಿದ್ದೇಶ್ವರ ಸ್ವಾಮಿಗಳು ಹಲವಾರು ಪವಾಡಗಳನ್ನು ಮೆರೆದರು. ಧಾರ್ಮಿಕ ಸಾಮರಸ್ಯಕ್ಕೆ ನಾಂದಿ ಹಾಡಿದರು. ಸಾಮಾಜಿಕ ಸುಧಾರಣೆ ತಂದ ಅವರು ಪುಷ್ಯ ಮಾಸದ ಬಿದಿಗೆಯ ದಿನ ಅಂದರೆ ದವನದ ಹುಣ್ಣಿಮೆಯಾದ ಎರಡು ದಿನಕ್ಕೆ ಲಿಂಗೈಕ್ಯರಾದ ನಂತರ ಅವರ ಗುರುಗಳಿಗಾಗಿ ನಿರ್ಮಿಸಿದ ಸಮಾಧಿಯಲ್ಲಿಯೇ ಅವರ ಗದ್ದುಗೆಯನ್ನು ಮಾಡಿ ಪೂಜಾರಂಭ ಮಾಡಲಾಯಿತು. ಇದೀಗ 18ನೇ ಪೀಠಾಧಿಪತಿಯಾಗಿ ಅಭಿನವ ಗವಿಸಿದ್ದೇಶ್ವರ ಮಹಾಸ್ವಾಮಿಗಳು ಶ್ರೀಮಠದ ಭವ್ಯ ಪರಂಪರೆಯನ್ನು ಮುನ್ನಡೆಸಿಕೊಂಡು ಹೋಗುತ್ತಿದ್ದಾರೆ.
ಅಭಿನವ ಗವಿಸಿದ್ದೇಶ್ವರ ಮಹಾಸ್ವಾಮಿಗಳ ಕಾಲದಲ್ಲಿ ಮಠವು “ನ ಭೂತೊ ನ ಭವಿಷ್ಯತಿ” ಎಂಬಂತೆ ಅಭಿವೃದ್ಧಿ ಕಂಡಿದ್ದು ಅದಕ್ಕೆ ಕಾರಣ ಮೂರ್ತಿ ಚಿಕ್ಕದಾದರೂ ಕೀರ್ತಿ ದೊಡ್ಡದು ಎಂಬಂತಿರುವ ಸರಳತೆ, ಸಾತ್ವಿಕತೆಯೇ ಮೈವೆತ್ತ ಘನ ತತ್ವ ಮಹಿಮರಾದ ಅಭಿನವ ಗವಿಸಿದ್ದೇಶ್ವರ ಮಹಾಸ್ವಾಮಿಗಳು.
ಬನದ ಹುಣ್ಣಿಮೆಯ ಹಿಂದಿನ ದಿನವೇ ನಂದಿ, ಈಶ್ವರ, ಸೂರ್ಯ, ಚಂದ್ರ ಮತ್ತು ಪ್ರಣವ ಮಂತ್ರಗಳನ್ನು ಒಳಗೊಂಡಿರುವ ಬಸವಪಟವನ್ನು ಪೂಜೆ ಮಾಡಿ ಗವಿಸಿದ್ದೇಶ್ವರರ ಕರ್ತೃಗದ್ದುಗೆಯ ಸುತ್ತಲು ಐದು ಸುತ್ತು ಹಾಕಿ ನಂತರ ಮಠದ ಮುಂಭಾಗದ ಕಲ್ಲಿನ ಕಂಬಕ್ಕೆ ಕಟ್ಟುವ ಮೂಲಕ ಜಾತ್ರೆಯ ಕಾರ್ಯಕ್ರಮಕ್ಕೆ ನಾಂದಿ ಹಾಡುತ್ತಾರೆ.
ಮಠದ ಆವರಣದಲ್ಲಿರುವ ಕೆರೆಯಲ್ಲಿ ತೆಪ್ಪೋತ್ಸವ ನಡೆಯುತ್ತದೆ. ಗವಿಸಿದ್ದೇಶ್ವರರ ಉತ್ಸವ ಮೂರ್ತಿಯನ್ನು ಮೆರವಣಿಗೆಯ ಮೂಲಕ ತಂದು ಹೂವಿನಿಂದ ಅಲಂಕೃತವಾದ ತೆಪ್ಪದಲ್ಲಿ ಪ್ರತಿಷ್ಠಾಪಿಸಿ ಪೂಜೆ ಪುರಸ್ಕಾರಗಳನ್ನು ಕೈಗೊಂಡು ಕೆರೆಯಲ್ಲಿರುವ ಶಿವಲಿಂಗದ ಸುತ್ತಲೂ ತೆಪ್ಪದಲ್ಲಿ ಪ್ರದಕ್ಷಿಣೆ ಹಾಕುವ ಮೂಲಕ ತೆಪ್ಪೋತ್ಸವವನ್ನು ನಡೆಸಲಾಗುತ್ತದೆ. ಕಣ್ಮನ ಸೆಳೆಯುವ ಬೆಳಕಿನ ದೀಪಗಳ ರಂಗೋಲಿ.ಮಧ್ಯಾಹ್ನ 3 ಗಂಟೆಯಿಂದಲೇ ತೆಪ್ಪೋತ್ಸವವನ್ನು ನೋಡಲು ಹಾಜರಾಗುವ ಭಕ್ತ ಸಮೂಹದ ಉಲ್ಲಾಸ, ಉತ್ಸಾಹಗಳು ಭಕ್ತಿ ಭಾವದ ವ್ಯಕ್ತ ಸ್ವರೂಪದಂತೆ ತೋರಿದರೆ ಆಶ್ಚರ್ಯವಿಲ್ಲ.
14ನೇ ದಿನಾಂಕ ಮಠದ ಮೇಲ್ಭಾಗದಲ್ಲಿರುವ ಅನ್ನಪೂರ್ಣೇಶ್ವರಿ ದೇಗುಲಕ್ಕೆ ಕೊಪ್ಪಳ ತಾಲೂಕಿನ ಇರಕಲ್ಲಗಡದ ಗ್ರಾಮದ ಸಂತೋಷಿಮಾತೆಯ ಭಕ್ತರು ಪಾದಯಾತ್ರೆಯಲ್ಲಿ ಬಂದು ಉಡಿ ತುಂಬಿದ ನಂತರ ಇಡೀ ಊರಿನ ಜನರೆಲ್ಲ ಸರತಿ ಸಾಲಿನಲ್ಲಿ ನಿಂತು ಮಾತೆ ಅನ್ನಪೂರ್ಣೇಶ್ವರಿ ದೇವಿಗೆ ಉಡಿ ತುಂಬುವುದರ ಜೊತೆಗೆ ತಮ್ಮ ಮನದ ಆಕಾಂಕ್ಷೆಯ ಮೇರೆಗೆ ಅಲ್ಲಿ ನೆರೆದಿರುವ ಮುತ್ತೈದೆಯರಿಗೆ ಉಡಿಯನ್ನು ತುಂಬುತ್ತಾರೆ. ಜಾತ್ರೆಗೆಂದು ತಮ್ಮ ತವರಿಗೆ ಬಂದ ಹೆಣ್ಣುಮಕ್ಕಳಿಗೆ ಇಲ್ಲಿ ತಮ್ಮ ಬಾಲ್ಯದ ಸ್ನೇಹಿತರು ಸಿಕ್ಕು ಹಳೆಯ ನೆನಪುಗಳನ್ನೆಲ್ಲ ಹೆಕ್ಕಿ ಸಂತಸದಿಂದ ಬೀಗುತ್ತಾರೆ. ಪರಸ್ಪರ ಉಡಿ ತುಂಬಿ ಧನ್ಯತೆಯ ಭಾವವನ್ನು ಹೊಂದುತ್ತಾರೆ.
ಮರುದಿನ ಮುಂಜಾನೆ ಕೊಪ್ಪಳ ನಗರದ ಜಡೆ ಗೌಡರ ಮನೆಯಲ್ಲಿ ಶ್ರೀ ಗವಿಸಿದ್ದೇಶ್ವರನ ಮೂರ್ತಿಯನ್ನು ಪೂಜಿಸಿ ವಾದ್ಯ ವೃಂದದವರ ಸಮೇತ ನಗರದ ಪ್ರಮುಖ ಬೀದಿಗಳಲ್ಲಿ ಮೆರವಣಿಗೆ ಮಾಡುತ್ತಾ ಮಠಕ್ಕೆ ತರುತ್ತಾರೆ. ಮುದ್ದಾಬಳ್ಳಿ, ಹಲಗೇರಿ ಮತ್ತು ಮಂಗಳಾಪುರ ಗ್ರಾಮಗಳಿಂದಲೂ ಕೂಡ ಶ್ರೀ ಗವಿಸಿದ್ದೇಶ್ವರರ ಕಳಸ, ಮೂರ್ತಿಗಳನ್ನು ಮೆರವಣಿಗೆಯಲ್ಲಿ ಆಯಾ ಗ್ರಾಮಸ್ಥರ ನೇತೃತ್ವದಲ್ಲಿ ಮಠಕ್ಕೆ ತರಲಾಗುತ್ತದೆ. ಸಾಯಂಕಾಲ ನಿಶ್ಚಿತ ಮುಹೂರ್ತ ಕಾಲದಲ್ಲಿ ಅತಿಥಿಗಳಿಂದ ಜಾತ್ರಾ ಮಹೋತ್ಸವ ಉದ್ಘಾಟನೆಗೊಂಡು ಗವಿಸಿದ್ದೇಶ್ವರನ ಉತ್ಸವ ಮೂರ್ತಿಯನ್ನು ಒಳಗೊಂಡ ಅಲಂಕೃತಗೊಂಡ ತೇರು ಭಕ್ತರ ಉಘೇ ಉಘೇ ಘೋಷದೊಂದಿಗೆ ಸಾಗುತ್ತದೆ. ಕೇವಲ ತಲೆಗಳು ಮಾತ್ರ ಕಾಣುವಂತಹ ಸಾಗರೋಪಾದಿಯಲ್ಲಿ ಜನರನ್ನೊಳಗೊಂಡ ಭಕ್ತ ಸಮೂಹ ರಥ ಸಾಗುವ ಹಾದಿಯಲ್ಲಿ ಉತ್ತತ್ತಿ, ಬಾಳೆಹಣ್ಣುಗಳನ್ನು ದೇವರಿಗೆ ಸಮರ್ಪಿಸುತ್ತಾ, ಹಾಗೆ ಎಸೆದಂತಹ ತಮಗೆ ದೊರೆತ ಬಾಳೆಹಣ್ಣು, ಉತ್ತತ್ತಿಗಳನ್ನು ಮಹಾಪ್ರಸಾದವೆಂದು ಆಯ್ದುಕೊಂಡು ತಮ್ಮ ನೆಂಟರಿಷ್ಟರಿಗೆ ಹಂಚಿ ತಾವು ಸ್ವೀಕರಿಸುತ್ತಾರೆ.
ರಥೋತ್ಸವದ ಮರುದಿನ ಸಂಜೆ ಚಿಕ್ಕೇನಕೊಪ್ಪದ ಶರಣರು ದೀಡ ನಮಸ್ಕಾರವನ್ನು ಹಾಕುತ್ತಾರೆ. ಅಂದು ಅವರೊಂದಿಗೆ ಎಲ್ಲ ಜನಾಂಗದ ಜನರು ಕೂಡ ತಮ್ಮ ತಮ್ಮ ಸಂಕಲ್ಪದಂತೆ ದೀಡ ನಮಸ್ಕಾರವನ್ನು ಹಾಕುತ್ತಾರೆ. ಅಂದು ರಾತ್ರಿ ಶ್ರೀ ಮಠದ ವತಿಯಿಂದ ಮದ್ದು ಸುಡುವ ಮೂಲಕ ಆಗಸದಲ್ಲಿ ವಿವಿಧ ಬಗೆಯ ಬಣ್ಣಗಳ ಪಟಾಕಿಯ ಚಿತ್ತಾರಗಳ ಮೂಡುವಿಕೆ. ಕಣ್ಣು ಕೋರೈಸುವ ಬೆಳಕಿನ ಚಿತ್ತಾರ ಜನರ ಮನಗಳನ್ನು ಬೆಳಗುತ್ತದೆ.
ಹಳ್ಳಿಯ ಜನರಂತೂ ರಥೋತ್ಸವದ ದಿನ ಬೆಳಗಿನ ಸಮಯದಲ್ಲಿಯೇ ಗವಿಸಿದ್ದೇಶ್ವರನಿಗೆ ನೈವೇದ್ಯದ ಎಡೆಯನ್ನು ಮಡಿಯಿಂದ ತಂದುಕೊಟ್ಟು ದೇವರಿಗೆ ನಮಿಸಿ, ಕಾಯಿ ಒಡೆಸಿಕೊಂಡು ದಾಸೋಹ ಭವನದಲ್ಲಿ ಪ್ರಸಾದ ಸ್ವೀಕರಿಸುತ್ತಾರೆ. ರಥೋತ್ಸವದ ನಂತರ ಮಕ್ಕಳಿಗೆ ಅವರಿಷ್ಟದ ಸಾಮಗ್ರಿಗಳನ್ನು ಕೊಡಿಸಲು ಜಾತ್ರೆಯಲ್ಲಿ ತಿರುಗಾಡುತ್ತಾ ..ಹೆಣ್ಣು ಮಕ್ಕಳು ಬಳೆ ಸಾಲಿನಲ್ಲಿಯೂ, ಪುಟ್ಟ ಮಕ್ಕಳು ಆಟದ ಸಾಮಾನುಗಳ ಸಾಲಿನಲ್ಲಿಯೂ, ಗಂಡಸರು ಒಕ್ಕಲುತನದ ಸಾಮಗ್ರಿಗಳನ್ನು ಖರೀದಿಸಲು ಮುಗಿ ಬೀಳುತ್ತಾರೆ. ಬಹುಶಹ ಬನಶಂಕರಿಯ ಜಾತ್ರೆಯನ್ನು ಬಿಟ್ಟರೆ, ಕೊಪ್ಪಳ ಜಾತ್ರೆಯಷ್ಟು ವೈವಿಧ್ಯಮಯ ಜಾತ್ರೆ ಮತ್ತೆಲ್ಲೂ ಇಲ್ಲ. ಬಹಳಷ್ಟು ಗೌಜಿ ಗದ್ದಲಗಳ ಮಧ್ಯದಲ್ಲಿಯೂ ಶಿಸ್ತು, ಸಮಯಪ್ರಜ್ಞೆ, ಸಂಸ್ಕೃತಿಯ ಹಿರಿಮೆಯನ್ನು ಮೆರೆಯುವ ಏಕೈಕ ಜಾತ್ರೆ ಕೊಪ್ಪಳದ ಗವಿಸಿದ್ದೇಶ್ವರ ಮಠದ ಜಾತ್ರಾ ಮಹೋತ್ಸವ.
ಜಾತ್ರೆಯ ಮೊದಲ ಮೂರು ದಿನಗಳಲ್ಲಿ ರಾಷ್ಟ್ರೀಯ ಮತ್ತು ಅಂತರಾಷ್ಟ್ರೀಯ ಮಟ್ಟದಲ್ಲಿ ವಿವಿಧ ಕ್ಷೇತ್ರಗಳಲ್ಲಿ ಸಾಧನೆ ಮಾಡಿದ ಸಾಧಕರನ್ನು ಕರೆಸಿ, ಪರಿಚಯಿಸಿ ಅವರನ್ನು ಸನ್ಮಾನಿಸುತ್ತಾರೆ. ರಾತ್ರಿಯ ಹೊತ್ತಿನಲ್ಲಂತೂ ಸಾಂಸ್ಕೃತಿಕ ಲೋಕ ಕೈ ಬೀಸಿ ಕರೆಯುತ್ತದೆ. ಸಂಗೀತ, ನೃತ್ಯ, ನಾಟಕ, ಜಾನಪದ, ತತ್ವಪದ ಮುಂತಾದ ವೈವಿಧ್ಯಮಯ ಸಂಗೀತ ಮತ್ತು ಸಾಂಸ್ಕೃತಿಕ ಕಾರ್ಯಕ್ರಮಗಳು ಜನರನ್ನು ಬೇರೊಂದು ಲೋಕಕ್ಕೆ ಕರೆದೊಯ್ಯುತ್ತವೆ. ಜೊತೆ ಜೊತೆಗೆ ಮನುಷ್ಯನನ್ನು ಭೌತಿಕತೆಯಿಂದ ಪಾರಮಾರ್ಥಿಕತೆಯಡೆಗೆ ಕರೆದೊಯ್ಯುವ ಆಧ್ಯಾತ್ಮಿಕ ಚಿಂತನೆಗಳು, ಗೋಷ್ಠಿಗಳು ವೈಚಾರಿಕತೆಯನ್ನು, ಆಧ್ಯಾತ್ಮಿಕ ನಿಲುವನ್ನು, ಧಾರ್ಮಿಕ ತಿಳುವಳಿಕೆಯನ್ನು ಜನರಲ್ಲಿ ಉಂಟುಮಾಡುತ್ತವೆ. ಇದೆಲ್ಲಕ್ಕೂ ಮೆರುಗು ನೀಡುವಂತೆ ಕಳೆದ ವರ್ಷ ಜಾತ್ರೆಯಲ್ಲಿ ಅಂಗವಿಕಲರಿಗೆ ವಿವಾಹ ಮಾಡಿಸುವುದರ ಜೊತೆ ಜೊತೆಗೆ ಅವರಿಗೆ ಅವರವರ ಜಿಲ್ಲೆಗಳಲ್ಲಿ ಉದ್ಯೋಗ ಕೈಗೊಳ್ಳಲು ಬೇಕಾಗುವ ಮೂಲಭೂತ ಸೌಲಭ್ಯಗಳನ್ನು ಮೂಲಭೂತ ಸೌಲಭ್ಯಗಳನ್ನು ಸರಕಾರೇತರ ಸಂಸ್ಥೆಗಳ ಸಹಾಯದಿಂದ ಕೈಗೊಂಡಿದ್ದಾರೆ … ಜಾತ್ರೆಗೆ ಒಂದು ವಾರ ಮುಂಚೆಯೇ ಈ ಸಾಮೂಹಿಕ ವಿವಾಹ ಕಾರ್ಯಕ್ರಮವು ನೆರವೇರಿದ್ದು ಗವಿಸಿದ್ದೇಶ್ವರ ಮಠ ಸಮಾಜದ ಅಲಕ್ಷಿತ ಜನರ ಸರ್ವಾಂಗೀಣ ಅಭಿವೃದ್ಧಿಗೆ ಮತ್ತೊಂದು ಹೊಸ ಆಯಾಮವನ್ನು ತೋರಿದೆ.
ಹೀಗೆ ಲಕ್ಷಾಂತರ ಜನ ಭಕ್ತರು ಸೇರುವ ತ್ರಿವಿಧದಾಸೋಹಗಳು ನಡೆಯುವ ದಕ್ಷಿಣ ಭಾರತದ ಮಹಾಕುಂಭಮೇಳ ಎಂಬ ಹೆಸರನ್ನು ಗಳಿಸಿರುವ ಕೊಪ್ಪಳದ ಗವಿಮಠದ ಜಾತ್ರೆ ಹಲವು ದಿನಗಳ ಕಾಲ ನಡೆದು ತೆರೆಮರೆಗೆ ಸರಿಯುತ್ತದೆ. ತಿಂಗಳಪರ್ಯಂತ ಜಾತ್ರೆಯ ನೆನಪನ್ನು ಮೆಲುಕು ಹಾಕುತ್ತಾ ಜನರು ಮುಂದಿನ ಜಾತ್ರೆಗಾಗಿ ಕಾಯುತ್ತಾರೆ. ಹಾಗಾದರೆ ನೀವೂ ಬರುವಿರಲ್ಲವೇ…. ಕೊಪ್ಪಳ ಜಾತ್ರೆಯ ನೋಡಲು, ಅನುಭವಿಸಲು ಕಣ್ತುಂಬಿಕೊಳ್ಳಲು.
ವೀಣಾ ಹೇಮಂತ್ ಗೌಡ ಪಾಟೀಲ್ ಮುಂಡರಗಿ ಗದಗ್
